പാർവതിയും പോത്തനും ഒന്നിക്കുന്നു
ഡോണ് പാലത്തറ തിരക്കഥയെഴുതി സംവിധാനം ചെയ്യുന്ന ചിത്രത്തിൽ പാര്വതി തിരുവോത്തും ദിലീഷ് പോത്തനും പ്രധാന വേഷങ്ങളിൽ എത്തുന്നു. ജോമോന് ജേക്കബ് ആണ് സിനിമയുടെ നിര്മാണം. നവംബര് അവസാനത്തോടെ ചിത്രീകരണം ആരംഭിക്കുമെന്നാണ് വിവരം.

അലക്സ് ജോസഫാണ് സിനിമയുടെ ഛായാഗ്രഹണം. ഡോണിന്റെ 1956 മധ്യതിരുവിതാംകൂര് എന്ന സിനിമയുടെ ഛായാഗ്രഹണവും അലക്സ് ആയിരുന്നു. 2023 ല് പുറത്തിറങ്ങിയ ഫാമിലിയ്ക്ക് ശേഷം ഡോണ് പാലത്തറ ഒരുക്കുന്ന ചിത്രമാണിത്. രാജേഷ് മാധവനും അര്ജുന് രാധാകൃഷ്ണനുമാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.

അതേസമയം, ഹൃത്വിക് റോഷന് നിര്മിക്കുന്ന വെബ് സീരീസിന്റെ തിരക്കുകളിലാണ് പാര്വതി ഇപ്പോള്. ആമസോണ് പ്രൈമിനായി ഒരുക്കുന്ന സ്റ്റോം എന്ന് പേരിട്ടിരിക്കുന്ന സീരീസില് സബ ആസാദ്, സൃഷ്ടി ശ്രീവാത്സവ, അലയ എഫ്, രമ ശര്മ തുടങ്ങിയവരും പ്രധാന വേഷങ്ങളിലെത്തുന്നുണ്ട്. അജിത്പാല് സിങ് ആണ് സീരിസിന്റെ സംവിധാനം. മുംബൈയില് നടക്കുന്ന കഥയാണ് സീരീസ് പറയുന്നത്.