HbA1c പരിശോധനയെ മാത്രം ആശ്രയിക്കുന്നത് പ്രമേഹ നിർണ്ണയത്തിൽ കാലതാമസത്തിനും തെറ്റായ നിഗമനങ്ങൾക്കും കാരണമായേക്കാം എന്ന് ഇന്ത്യ കേന്ദ്രീകരിച്ചുള്ള പുതിയ പഠനം മുന്നറിയിപ്പ് നൽകുന്നു.

ഇന്ത്യയിൽ വ്യാപകമായി ഉപയോഗിക്കപ്പെടുന്ന ഗ്ലൈക്കേറ്റഡ് ഹീമോഗ്ലോബിൻ (HbA1c) പരിശോധന ദശലക്ഷക്കണക്കിന് ഇന്ത്യക്കാരുടെ രക്തത്തിലെ ഗ്ലൂക്കോസ് അളവ് കൃത്യമായി പ്രതിഫലിപ്പിച്ചേക്കില്ലെന്ന് ശാസ്ത്ര ജേർണൽ ആയ 'ലാൻസെറ്റ് റീജിയണൽ ഹെൽത്ത്: സൗത്ത് ഈസ്റ്റ് ഏഷ്യ'യിൽ പ്രസിദ്ധീകരിച്ച പുതിയ പഠനം ചൂണ്ടിക്കാണിക്കുന്നു.

3 മാസത്തെ ആവറേജ് ഷൂഗർ ലെവൽ എന്ന നിലയിൽ വളരെ ആധികാരികമായി നമ്മൾ കണക്കാക്കുന്ന ടെസ്റ്റ് ആണ് HbA1c.

വിളർച്ച (Anemia), ഹീമോഗ്ലോബിനോപ്പതികൾ, റെഡ് ബ്ലഡ് സെൽ എൻസൈം (G6PD) കുറവ് എന്നിവ കൂടുതലായി കാണപ്പെടുന്ന പ്രദേശങ്ങളിലെ ആളുകളിലാണ് ഈ പ്രശ്നം കൂടുതൽ പ്രകടമാകുന്നത്.

ദക്ഷിണേഷ്യയിൽ ടൈപ്പ് 2 പ്രമേഹം നിർണ്ണയിക്കുന്നതിനോ നിരീക്ഷിക്കുന്നതിനോ ഉള്ള ഏക ഉപാധിയായി HbA1c-യെ മാത്രം ആശ്രയിക്കുന്നതിനെ ഈ പഠനം ചോദ്യം ചെയ്യുന്നു.

എന്താണ് HbA1c?

HbA1c പ്രധാനമായും ഹീമോഗ്ലോബിനിലെ ഗ്ലൈക്കേഷൻ (Glycation) പ്രക്രിയയെയാണ് അളക്കുന്നത്. വിളർച്ചയോ മറ്റ് രക്തസംബന്ധമായ തകരാറുകളോ കാരണം ഹീമോഗ്ലോബിന്റെ അളവ്, ഘടന അല്ലെങ്കിൽ ആയുസ്സ് എന്നിവയിൽ മാറ്റം വന്നാൽ, അത് HbA1c മൂല്യങ്ങളെ തെറ്റായി കാണിക്കാൻ ഇടയാക്കും. ഇത് രക്തത്തിലെ യഥാർത്ഥ പഞ്ചസാരയുടെ അളവിനെക്കുറിച്ച് തെറ്റിദ്ധാരണയുണ്ടാക്കും.

"HbA1c-യെ മാത്രം ആശ്രയിക്കുന്നത് പ്രമേഹാവസ്ഥയെ തെറ്റായി തരംതിരിക്കാൻ കാരണമാകും," എന്ന് ഫോർട്ടിസ് സി-ഡോക് സെന്റർ ഓഫ് എക്സലൻസ് ഫോർ ഡയബറ്റിസ് ചെയർമാനും പഠനത്തിന്റെ മുഖ്യ രചയിതാവുമായ പ്രൊഫസർ അനൂപ് മിശ്ര പറഞ്ഞു. കൃത്യസമയത്ത് രോഗനിർണ്ണയം നടക്കാത്തതും തെറ്റായ ചികിത്സാരീതികളിലേക്ക് നയിക്കുന്നതും ഇതിന്റെ ഫലമാകാം.

പഠനത്തിലെ പ്രധാന കണ്ടെത്തലുകൾ:

* തെറ്റായ അളവുകൾ: വിളർച്ചയോ പാരമ്പര്യമായി ലഭിക്കുന്ന രക്ത വൈകല്യങ്ങളോ ഉള്ളവരിൽ HbA1c മൂല്യം യഥാർത്ഥ ഗ്ലൂക്കോസ് നിലയേക്കാൾ കൂടുതലോ കുറവോ ആയി കാണപ്പെടാം.

* പോഷകാഹാരക്കുറവ്: ഇന്ത്യയുടെ ചില ഭാഗങ്ങളിൽ (2025-ലെ കണക്കുകൾ പ്രകാരം ജനസംഖ്യയുടെ 50%-ലധികം) അയൺ ഡെഫിഷ്യൻസി അനീമിയ കൂടുതലാണ്. ഇത് HbA1c പരിശോധനാഫലത്തെ ബാധിക്കും.

* രോഗനിർണ്ണയത്തിലെ കാലതാമസം: G6PD കുറവുള്ള പുരുഷന്മാരിൽ പ്രമേഹ നിർണ്ണയം 4 വർഷം വരെ വൈകാൻ ഇത് കാരണമായേക്കാം. ഇത് ഹൃദയം, വൃക്ക തുടങ്ങിയ അവയവങ്ങളിൽ സങ്കീർണ്ണമായ പ്രശ്നങ്ങളുണ്ടാക്കാം.

* ലാബുകളുടെ ഗുണനിലവാരം: വിവിധ ലാബുകളിലെ ഗുണനിലവാരത്തിലുള്ള വ്യത്യാസങ്ങൾ HbA1c പരിശോധനയുടെ കൃത്യതയെ ബാധിക്കുന്നു.

* പൊതുജനാരോഗ്യ കണക്കുകൾ: HbA1c മാത്രം അടിസ്ഥാനമാക്കി നടത്തുന്ന സർവേകൾ ഇന്ത്യയിലെ യഥാർത്ഥ പ്രമേഹബാധിതരുടെ എണ്ണം കൃത്യമായി കാണിക്കണമെന്നില്ല.

ശുപാർശ ചെയ്യുന്ന രീതികൾ (Recommended Approach)

സാമ്പത്തിക സാഹചര്യം പരിഗണിച്ച് രണ്ട് തരത്തിലുള്ള ചികിത്സാ ചട്ടക്കൂടുകൾ ഗവേഷകർ നിർദ്ദേശിക്കുന്നു:

* പരിമിതമായ സൗകര്യങ്ങളുള്ളയിടങ്ങളിൽ: രോഗനിർണ്ണയത്തിനായി OGTT (ഗ്ലൂക്കോസ് കുടിച്ച ശേഷമുള്ള പരിശോധന) നടത്തണം. നിരീക്ഷണത്തിനായി ആഴ്ചയിൽ 2-3 തവണ ഗ്ലൂക്കോസ് മീറ്റർ ഉപയോഗിച്ചുള്ള പരിശോധനയും (SMBG), ഒപ്പം ഹീമോഗ്ലോബിൻ പരിശോധനയും നടത്തണം.

* നൂതന സൗകര്യങ്ങളുള്ള ആശുപത്രികളിൽ: HbA1c പരിശോധനയ്ക്കൊപ്പം OGTT-യും കൂടി ചേർത്ത് രോഗനിർണ്ണയം നടത്തണം. കൂടാതെ നിരന്തരമായ ഗ്ലൂക്കോസ് മോണിറ്ററിംഗ് (CGM), ഫ്രക്ടോസാമൈൻ (fructosamine) തുടങ്ങിയ മാർക്കറുകളും ഉപയോഗിക്കാം.

ആവശ്യമെന്നു കണ്ടാൽ അയൺ സ്റ്റഡീസ്, ഹീമോഗ്ലോബിൻ ഇലക്ട്രോഫോറെസിസ്, G6PD ടെസ്റ്റിംഗ് എന്നിവയും നടത്താൻ നിർദ്ദേശിക്കുന്നു.

ഇന്ത്യയിലെ ഏറ്റവും വലിയ ആരോഗ്യപ്രശ്നങ്ങളിലൊന്നായി പ്രമേഹം മാറിക്കഴിഞ്ഞു. ഒരുകാലത്ത് 'പണക്കാരുടെ രോഗം' എന്നറിയപ്പെട്ടിരുന്ന പ്രമേഹം ഇന്ന് യുവാക്കളെയും ഐടി ജീവനക്കാരെയും കൗമാരക്കാരെയും വരെ ബാധിക്കുന്നു. നിലവിൽ 100 ദശലക്ഷത്തിലധികം ഇന്ത്യക്കാർ പ്രമേഹബാധിതരാണെന്നാണ് കണക്കാക്കുന്നത്. കൃത്യസമയത്ത് തിരിച്ചറിയാത്തതിനാൽ ഹൃദയം, വൃക്ക, കണ്ണുകൾ, നാഡികൾ എന്നിവയ്ക്ക് ഗുരുതരമായ തകരാറുകൾ സംഭവിച്ച ശേഷമാണ് പലരും ഈ രോഗം തിരിച്ചറിയുന്നത്.