പ്രണയനഗരമായ പാരിസിനെ വിസ്മയിപ്പിച്ച് ഇന്ത്യൻ കരകൗശല വൈദഗ്ധ്യത്തിൽ വിരി‍ഞ്ഞ ‘ഫാഷൻ പ്രണയകാവ്യം’.  ഡിസൈനർ രാഹുൽ മിശ്രയുടെ ‘പ്രണയമായി മാറുക’ (Becoming Love) എന്ന കലക്ഷനാണ് പാരിസ് ഹൗട് കുറ്റൂർ  വേദിയിൽ ശ്രദ്ധ നേടിയത്.  സൂഫിസത്തിൽ വിവരിക്കുന്ന ഏഴ് ഘട്ടങ്ങളിലൂടെയുള്ള പ്രണയത്തിന്റെ പരിണാമമാണ് ഈ കലക്ഷന്റെ പ്രചോദനമെന്ന് രാഹുൽ മിശ്ര പറയുന്നു.  
ആകർഷണത്തിൽ തുടങ്ങി അനുരാഗം, സമർപ്പണം, ആദരം, ഉപാസന, അഭിനിവേശം, ഒടുവിൽ മരണം വരെയുള്ള ഘട്ടങ്ങൾ നിറങ്ങളിലൂടെയും ഡിസൈനുകളിലുടെയും വേദിയിലെത്തി. ഓസ്ട്രിയൻ കലാകാരനായ ഗുസ്താവ് ക്ലിംറ്റിന്റെ പെയിന്റിങ്ങും ഈ വസ്ത്രങ്ങളിൽ സമന്വയിപ്പിച്ചിട്ടുണ്ട്.  രണ്ടായിരത്തിലേറെ കരകൗശല വിദഗ്ധരുടെ അധ്വാനമാണ് ഇതിനു പിന്നിൽ. പ്രിൻസസ് ഡയാനയുടെ പ്രശസ്തമായ തൊപ്പികൾ ഒരുക്കിയ സ്റ്റീഫൻ ജോൺസ് തയാറാക്കിയ ശിരോകവചങ്ങളും ഈ കലക്ഷന്റെ ഭാഗമാണ്.